Cebu - Ipasaka ugma sa kapolisan sa Talisay City ang kasong panulis batok sa usa ka drayber sa habal-habal nga nadakpan niadtong Biyernes sa buntag kinsa gipasanginlang mitulis sa usa ka babaye niadtong Huwebes sa hapon didto sa barangay San Isidro, Talisay.
Ang suspetsado nga si Jeffrey Paran, 29, nga taga South Poblacion, Naga , didto na hidakpi sa Naga, pinaagi sa kapolisan sa Talisay nga migukod kaniya.
Ang iyang gitulis mao si Maribel Fuentes, 30, nga taga barangay Calajoan, lungsod sa Minglanilla kinsa nagtrabaho isip katabang diha sa barangay San Isidro.
Si PO3 Arnold Damasco sa Talisay City Police Station mibutyag sa Banat News nga si Fuentes nagbarog sa daplin sa karsada dihang kalit lang mitungha si Paran nga nagsakay og motorsiklo dayong ti-on og pusil ngadto sa biktima dayong sakmit sa iyang cellphone.
Maayo nalang kay nakuha sa biktima ang plate number sa motorsiklo sa suspek maoy hinungdan nga natultolan kini sa kapolisan didto sa Naga ug dihang nasikop ang suspek, gibawi pa usab ang cellphone nga iyang gitulis gikan sa biktima. - Brenda D. Batuto (BANAT NEWS)