Carbon police station paimbestigaran ni Rama

Cebu - Dismayado si Cebu City Acting Mayor Michael Rama sa kapulisan sa Carbon Police Station 5 human malambigit og kontrobersiya may kalabutan sa kapakyas niini pag-blotter ug pagtanggong sa giingong anak og mayor nga gireklamo og malicious mischief.

Usa ka Gido Villanueva gireklamo sa hotel diha sa dalan Borromeo nga temporaryo niining gipuy-an, tungod sa gikatahong pagsunog niini sa kinumot nga mga resibo ug gibutang ubos sa smoke sensor ug sprinklers.

Kini ang hinungdan nga nisirit ang tubig ug nibaha ang parking area/storage area nga nahamutang sa ikaduhang andana sa hotel nga niresulta usab sa pagkadaut sa mga butang sa silong.

Alang kang Rama, dakong sayop ang gihimo sa mga polis sa Carbon kung tinuod ang taho nga wala itala ang maong hitabo sa blotter book ug sa kapakyas niini pagtanggong sa suspetsado human ireklamo.

“Kanunay gud ko nga nagpahinumdom nila about the rule of law that no one is above the law,” sumala ni Rama.

Gusto sa acting mayor nga imbestigahon ug palagputon sa dakbayan ang polis nga wala muhimo sa iyang katungdanan diha sa Carbon, sa samang higayon buot usab ni Rama nga paesplikahon ang hepe sa Carbon Police Station nga si Senior Inspector Pablo Cabildo sa maong kontrobersiya.

Nagkanayon ang acting mayor nga kung siya dili matagbaw sa eksplinasyon ni Cabildo, kini angayan usab nga ilakip sa pagpalagpot.

“Naa may ginganlan og command responsibility, unless moingon siya nga wa nako sila tudloi, ang pangutana karon kung naa ba siya’y gitudlo, kung wa siya’y gitudlo nagpasabot nga wa siya’y gihimo and therefore he should be out of his job,” dugang pamahayag ni Rama.

Matud sa acting mayor nga dili lang si Cebu City Police Office Director Senior Superintendent Patrocinio Comendador ang iyang sultihan sa iyang gusto nga mahitabo kun dili lakip na ang kadagkuan sa kapulisan. - Elly Bolonos (BANAT NEWS)