Cebu - Patay nang nakit-an niadtong Miyerkules sa buntag ang lawas sa usa ka 28-anyos nga lalaki nga gipusil-patay atol sa gipahigayong disco sa barangay Libertad siyudad sa Bogo ug gilabay lang ang patay’ng lawas niini sa luyo nga bahin sa stage sa maong lugar.Ang biktima mao si Policarpio Ursal Obial, 28, taga sitio Igsaog, barangay Nailon sa nahisgutang siyudad samtang ang suspek wala pa matumbok sa kapulisan sa paghimo ning balita.
Matud ni PO1 Jerry dela Cruz sa Bogo City Police dihang nahinabi sa Banat News ang mga batan-on na nga nabuntagan sa diskohan maoy nakadiskubre sa patay’ng lawas sa biktima mga alas 8:00 sa buntag nga nagbuy-od sa luyo nga bahin sa stage sa maong diskohan.
Sa gipahigayong autopsy sa medico legal officer sa siyudad sa Bogo nasuta nga ang biktima nakaangkon og duha ka samad pinusilan sa walang bahin sa lawas ug laing samad sa walang bahin sa iyang bukton sa wala pa matino nga kalibre sa armas nga maoy hinungdan sa iyang hinanaling kamatayon.
Dugang nahipos nga inpormasyon nga dunay disco nga ipahigayun sa matag gabii sa maong barangay nunot sa nagsingabot nga kapistahan niini karung adlaw’ng Sabado.
Ang kapulisan padayun pa sa ilang imbestigasyon pagtumbok sa suspek ug sa motibo sa krimen. - Darrel Carumba (BANAT NEWS)