Cebu - Ipaimbestigar sugod karong adlawa sa Regional Office sa Bureau of Fire Protection (BFP-7) ang mga sakop sa kabumberuhan sa lungsod sa Badian tungod sa report nga way bisan usa niini ang miresponde sa sunog sa milabay’ng gabii sa Badian National High School nga nahimutang sa barangay Poblacion.
Si deputy regional director Supt. Abundio Salinas Jr. mitug-an sa Banat News nakadawat sila’g report nga mga polis sa lungsod nga sila si PO3 Vincent Aguanta ug mga kaubanan ug sibilyang driver nga si Romeo Lamberte maoy nidala sa firetruck pagresponde tungod kay wala diha ang mga bombero.
Hinuon ang maong sunog nakontrolar dayon sulod sa lima ka minutos apan napagtong na ang bungbong sa usa sa mga edipisyo dihang naabtan napasiritan sa mga polis og tubig.
Giangkon hinuon ni Salinas nga wala pa siya makabasa sa report sa mga bombero sa maong lungsod.
Matud pa niya dako kaayong kalapasan ang nahimo sa maong mga bombero nga sila si FO3 Villarubia ug FO2 Wilfredo Tubalde kung may kamatuuran ang maong pasangil.
“Kana nga insidente dako kaayo nang kalapasan sa usa ka bombero.. dismissal sa ilang serbisyo kini kun mamatud-an nga wala didto sa ilang buhatan,” sumala pa ni Salinas.
Gipasabot niini nga bisan kun walay naugdaw nga edipisyo manubag gihapon sila tungod sa pag-abandonar sa ilang pwesto.
Samtang hepe sa operations sa provincial fire marshall office nga si SFO2 Vitoriano Mercado nga nahinabi sa Banat News nagkanayon way gikareport nga nasunog nga tunghaan sa Badian gumikan kay usa lang kini ka daob subay sa report nga iyang nadawat kang SFO2 Antonio Guzman sa Moalboal Fire Station.
Apan si PO3 Uldarico Lamosao sa Badian Police Station nga gikahinabi sa DySS niadtong miaging gabii mibutyag nga wala sila si Villarubia ug Tubalde dihang ilang nadawat ang alarma sa sunog.
Matud pa niini sila si PO3 Vincent Aguanta, PO3 Walter Macasling ug PO1 Arnel Tandoy ug civilan driver mao nalay nidala sa fire truck. – BANAT NEWS