CEBU - Nasikop ang usa ka tulisan kinsa migamit lang sa iyang tudlo sa paghadlok sa mga pasahero sa usa ka jeep nga pasaheroan didto sa dalan A.C. Cortes sa barangay Looc, dakbayan sa Mandaue sa miaging gabii.
Samtang sa maong tulis, naangol ang usa ka pasaherong babaye dihang milayat kini sa jeep sa kalisang sa tulisan.
Ang suspetsadong tulisan nga nasikop sa polis nailhan nga si Loreto Surban, 36, ulitawo nga taga sitio Tigib, barangay Malubog, dakbayan sa Sugbo.
Ang naangol mao usab si Arlene Nabisilla, hingkod, nga taga sitio Mohon , barangay Tisa dakbayan sa Sugbu.
Sa pasiunang imbestigasyon ni PO3 Gregorio Cabesares sa Station 5 sa Mandaue City Police Office (MCPO) nasuta nga samtang luwan si Nabisilla sa usa ka PUJ nga gimaneho ni Cerilo Sucal, 45, minyo, nga taga Punta Engaño dakbayan sa Lapulapu, uban sa lima ka laing pasahero, pag-abot didto sa dalan AC Cortes, si Surban mideklarar nga tulis.
Apan si Surban igo lang mikuot kunohay og armas sa iyang bulsa nga maoy nakapalisang sa mga pasahero nga misangpot sa paglayat ni Nabisilla sa sakyanan.
Nahiagom si Nabisilla sa mga samad ug bun-og sa iyang kalawasan hinungdan nga nalandig kini sa Mandaue City District Hospital.
Samtang si Surban wala kaikyas kang PO1 Jose Felisiano Rebusura nga nadestino sa Carbon Police Station sa dakbayan sa Sugbo kinsa nagsunod sa jeep nga gitulis ni Surban.
Sa dihang naposasan na, si Surban mibutyag kini nga tudlo ra sa iyang kamot ang iyang gition ug wala siya’y dala nga armas. (BANAT NEWS)