CEBU - Apilon sa ipresentar sunod semana sa Dangerous Drugs Board ngadto kang Presidente Gloria Macapagal Arroyo ang pag-ambush patay kang piskal Patrick Ian Osorio.
Kini maoy gipahibalo ni DDB undersecretary Clarence Paul Oaminal ug siya maoy gitahasan ni DDB chairman Vicente “Tito” Sotto nga mo-report sa update sa maong kaso.
Matud pa ni Oaminal nga si tsirman Sotto ni-coordinate ngadto kang NBI director Nestor Mantaring, diin nimando usab kini ngadto kang NBI-7 regional director Medardo Delemos nga mo-coordinate ngadto kaniya alang na sa weekly update sa kaso.
Gipadayag niini nga siya maoy mopresentar ngadto ni Arroyo kabahin sa status sa kaso ni Osorio.
Matud pa niya ang DDB mitutok sa maong kaso aron pagtino kung ang motibo may kalambigitan ba sa mga kaso sa illegal drugs nga nakuptan sa biktima sa wala pa mahitabo ang pagbanhig.
Nunot niini ang DDB nakig-alayon na karon sa NBI-7 ingon man sa Task Force Osorio sa Cebu City Police Office kinsa maoy lead agency sa imbestigasyon kabahin sa dagan sa imbestigasyon karon.
Gipasabot niini nga gusto usab ni Sotto nga ang NBI-7 ug ang CCPO dunay close coordination sa maong kaso sa ingon mailhan ang mga suspetsado ingon man utok sa krimen. (BANAT NEWS)