PO3 Cañete ambush sulbad na

Cebu - Sulbad na ang pagbanhig-patay kang PO3 Jose Clint Cañete kinsa gipusil niadtong Oktobre 21 sa niaging tuig diha sa tiilan sa First Mactan Bridge sakop sa barangay Looc dakbayan sa Mandaue.

Pormal nga gipresentar ni Police Regional Office (PRO-7) chief Ronald Roderos ang drayber sa gunman nga si Arnel Montero, 37, habal-habal driver taga sitio Guila-Guila barangay Bagalnga, lungsod sa Compostela.

Si Montero nadakpan atol sa gihimong joint buybust operation sa MCPO ug sa RAIDSOTF-7 diha sa North Reclamation Area niadtong Enero 9, giingong dugay nang nasayran sa mga polis nga sila ni Ronel Wagas maoy nipatay sa maong polis.

Panimalos maoy gituohang motibo sa pagpatay tungod kay ang gitumbok nga mastermind usa sa mga dinakpan sa maong polis nga hangtud karon natanggong pa sa karsel sa dakbayan sa Lapulapu nga si Paquito “ Boss Quipot” Oyao, usa ka drug personality sa Sugbu.

Si Roderos ni-presentar kang Montero uban sa kadagkuan sa kapulisan sa dakbayan sa Mandaue Sr. Supt. Orlando Ualat, deputy niining si Supt. Vicente Mersan Premne diha sa PRO-7 ug asawa sa namatay’ng police nga si Charito Cañete.

Idlas ug maro, maoy paghulagway sa mga polis sa grupo ni Wagas tungod kay una nila kining gilaang pinaagi sa pagkuha sa serbisyo niini pagpapatay og tawo apan wala kini mopakita hinungdan nga giorderan nila kini og illegal nga drugas apan si Montero ra ug usa ka Joseph Salem Barbero ray mipakita ug nasikop.

Samtang ang gunman nga gawasnon ning mga higayona giila sa kapulisan nga si Ronel Wagas usa ka gun-for hire nga naila sa bansag nga “Tata” ug taga barangay Tag-ubi lungsod sa Compostela.

Si Montero nitug-an nga si Wagas maoy nipusil-patay kang PO3 Ceñete, miangkon kining usa ka adlaw human sa pagpatay gihatagan siya’g “bahin” nga P5 mil gikan sa gibayad nga P20 mil.

Ang grupo ni Cañete nga mao ang Regional Anti-Illegal Drugs Operations Task Force (RAIDSOTG-7) maoy nakadakop kang Oyao pipila ka tuig ang nakalabay.

Ang kapulisan nakakuha’g ebidensya sa Lapulapu City Jail nga duha ka adlaw sa wa pa patya si PO3 Cañete, si Tata Wagas nibisita kang Oyao diha sa bilanggoan ug gituohang mao kining adlawa gimandoan si Wagas nga patyon ang maong polis.

Kasong murder ang ipasakang kaso sa kapulisan batok kang Montero ingon sa gunman nga si Wagas, lakip sa ilang pasakaan sa kaso mao ang mastermind nga si Oyao.

Si Montero nitug-an nga si Oyao maoy nagsugo kang Wagas sa pagpapatay sa nahisgutang polis samtang ang iyang papel mao ra ang pag-drive sa motorsiklo nga sakyan ni Wagas apan wala siya masayod nga si Cañete maoy target niini.

Sumala pa niya nga miadto sila sa parking lot sa Palace of Justice sa Lapulapu ug nagpaabot og pipila ka minutos ug dangtan pila ka gutlo nakit-an niya si Wagas nga nag-text ug daling mimando kaniyang duna silay sundan.

Matud pa niya pag-abot nila sa may taytayan ang motorsiklong ilang gisundan nimenor og dagan tungod sa traffic ug diha-diha kalit nga gipusil ni Wagas ang maong motorista ug human niini milahos sila balik sa Compostela. – BANAT NEWS