Pista Senyor opening salvo: Libuang deboto miuban sa prosesyon

Cebu - Liboang mga deboto ang mikuyog sa Walk for Jesus kagahapong adlawa alang sa pagsugod sa siyam ka adlaw nga nobenaryo sa kapistahan ni Senyor Santo Niño.

Nagsugod ang foot-penitential procession alas 4 kagahapon sa kaadlawon nga maoy magsilbing opening salvo sa kalihokan sa Basilica Minore del Santo Niño karung sunod semana.

Nanukad ang procession gikan sa Fuente Osmeña lahos na paingon sa Basilica.

Si Rosalinda Murillo, kinsa maoy national secretary sa Cofradia del Sto. Niño de Cebu nipakatap sa daghan kaayong mga security guard nga maoy mibantay sa entrances ug exits sa maong simbahan aron malikayan ang tinukmoray sa mga deboto ni Sr. Sto Niño.

Human sa procession kagahapon gisunod dayon ang novena mass ug gisundan usab dayon sa installation sa hermano ug hermana mayor.

Sulod sa siyam ka adlaw nga novena, dunay napulo ka mga misa nga himuon matag adlaw diin ang unang misa himuon sa alas 5:30 ug ang sunod nga misa mosunod human sa 30 minutos nga pahuway.

Atol sa procession kagahapon ang mga deboto nagdala og mga kandila, rosaryohan ug kaugalingong imahen sa Senyor Santo Niño   tungod kay mao kini ang tradisyon sa matag tuig.

Samtang si Gobernador Gwendolyn Garcia motambong sa misa novena karung alas 2 sa hapon diha sa Pilgrims Center sa Basilica.

Nunot niini ang gobernador nihatag na og signal ngadto sa tanang department heads sa Kapitolyo nga makatambong sa misa karung alas 2 sa hapon alang sa kapistahan sa mahal nga patron.

Apan nipasidaan hinuon ang gobernadora sa mga kawani sa Kapitolyo nga dili maghurot sa pagsimba aron dili sila maapiki sa pagserbisyo sa katawhan nga dunay transaksyon sa mga buhatan sa Kapitolyo.

Si Garcia uban sa kadagkuan sa legislative department maoy mangu sa pagtambong sa unang misa novena diha sa Pilgrim Center.

Ang gobernador kinsa wala modayon sa paglarga ngadto sa Hongkong kagahapong adlawa miingon nga iya gyud tambungan ang unang misa ug novena kay mao kini iyang panaad ngadto sa Balaang Bata nga si Sr. Sto Niño nga mosimba gyud human sa iyang kadaugan sa bugnong lugaynon niadtong 2004.

Ang provincial government mao usab ang sponsor sa unang misa novena karung hapon. – BANAT NEWS