Cebu - Ang pangulo sa kapolisan sa Central Visayas nga si Chief Supt. Ronald Roderos mimando kang Cebu City Police Office Director Sr. Supt. Patrocinio Comendador nga mopahigayon og dialogue batok sa nagkasunging pamilya sa Helen’s Lechon ug sa kabanay sa gipusil patay nga si Methusael Inesola kinsa maoy tag-iya sa Methus Lechon.
Matud pa ni Roderos kung dili ipahigayon ang dayalogo sa duha ka mga kampo sa mas daling panahon maghatag kini og hulga sa kahapsay ug kalinaw dinhi sa dakbayan ilabi na kay nagsingabot na ang Sinulog.
Sa higayon nga dili mosanong sa dayalogo ang duha ka kampo, si Roderos nagkanayon iyang irekomendar ngadto sa Cebu City Hall nga dili na i-renew ang tagsa-tagsa nila ka mga business permits.
Samtang si Comendador mitug-an nga ipatawag ang kabanay sa duha ka kampo aronsa dialogue tungod kay ila pang unahon ang pagsang-at og kaso sa piskaliya batok sa mga suspek.
Tumong sa dayalogo nga mahilot ang dugay na nilang panagbangi sa duha ka pamilya nga gituuhang tungod sa panagribal sa negosyo sa litson sa duha ka banay nga pulos nahimutang sa usa ka dapit.
Nasayran si Inesola gipusil-patay niadtong petsa 31 sa gabii dihang nagbantay kini sa iyang litsonan diha sa barangay Lahug.
Hinuon nadakpan ang duha sa tulo ka mga mamumuno nga sila si Diosdado Ortega, 30, nga taga sitio Fatima barangay Basak, Pardo ug Jacjie Trazona taga Tagonol, Cogon Pardo kinsa pulos asset sa Regional Anti Illegal Drugs Special Operation Task Group (RAIDSOTG)-7.
Samtang pabilin pang gipangita sa kapolisan ang ikatulong suspek nga si Yuli Ramas taga Pardo ning dakbayan sa Sugbu.
Si PO3 Kent Yngayo nga nadestino sa PRO-7 nga maoy gidangpan sa nangadakpang suspetsado human sa pagpamusil ug naapil sad pagkasikop tungod sa mga armas nga nakuha diha sa iyang balay.
Matud ni Roderos wala pa hinuoy ebidensya nga magtumbok nga dunay direktang partisipasyon si PO3 Yngayo sa maong krimen. – BANAT NEWS