Curfew sa Talisay ibalik karong Lunes

CEBU - Human sa paghatag og higayon ngadto sa mga batan-on pinaagi sa temporaryong paghunong sa curfew sa pagsaulog sa Pasko ug Bag-ong Tuig subling ibalik karong Lunes ang curfew.

Si Osmundo Manreal Jr. presidente sa Association of the Barangay Captain (ABC) sa pakighinabi niini sa Banat News kagahapon mibutyag nga niadtong Disyembre 22, 2008 temporaryo nilang gilibkas ang curfew aron ang mga batan-on ang makahigayon sa pagsimba sa Misa de Gallo ug makatambong usab sa mga salo-salo.

Apan matud niini nga duna siya’y nadawat nga taho nga dunay mga insidenteng nahitabo nga naglambigit na pud sa mga batan-on hinungdan nga karong Domingo mogama siya og memorandum sa pagbalik sa curfew sa mga batan-on.

Ang kapolisan ug kabarangayan sa Talisay padalhan og kopya sa maong memorandum aron sila mapahibawo sa pagpabalik sa operasyon sa curfew.

Si Sr. Insp. Jovito Canlapan sa pakighinabi niini sa Banat News kagahapon nagkanayon nga sukad sa temporaryong pagpahunong sa operasyon sa curfew wala sila makasugat og mga insidente nga nalambigit ang mga menor de edad gawas niadtong Huwebes sa gabii kinsa duha ka menor de edad nga nagpanuigon og 15 ug 17 nasakpan nga naghingos og rugby.

Si Canlapan mibutyag nga   wala sad silay nadawat nga report nga may nabuthan og mga pabuto o naigo sa saag nga bala atol sa Pasko ug Bag-ong Tuig nga nakumpirmar usab sa Banat News sa Talisay City District Hospital.    (BANAT NEWS)