YEAR-END REPORT: 'Black Suede' scandal nakapauwaw sa Sugbu

CEBU - Ang Sugbu nakaangkon og daghang pasidungog sa tuig 2008 gikan sa negosyo, paugnat sa kusog ug uban pa sama sa pagsikat og maayo sa Dancing Inmates sa Cebu Provincial Rehabilitation Center, apan usa sa nakahatag og kauwawan sa Sugbu mao ang “Black Suede” scandal.

Usa ka 39-anyos nga Genaro “Jan Jan” Jorolan ang midangop sa Vicente Sotto Memorial Medical Center aron ipa-opera ang nag-ungot nga lata sa body spray diha sa agianan sa iyang hugaw.

Miangkon siyang nakighilawas sa usa ka lalaki niadtong Bag-ong Tuig sa pagsulod sa 2008 apan dihang nalango siya sa bino gipanamastamasan siya niini ug gipaslakan ang iyang lubot sa maong canister sa pahumot maong midangop siya sa mga doktor.

Hinuon wala maglangay ang mga doctor sa VSMMC sa pag-opera kaniya niadtong Enero 3 ug gani gipangandaman kini og maayo sa maong ospital pinaagi sa pagkuha og video alang sa umaabot nga pagtuon.

Apan nakugang nalang si Jorolan dihang migawas ang usa ka video nga susama gyud sa sitwasyon nga iyang naagian diha sa YouTube, dako ang iyang pagtuong siya ang maong pasyente nga gibugal-bugalan ug gikataw-an sa mismong mga tawong iyang gisaligan sa iyang kinabuhi sa maong taknaa.

Sa iyang paminaw gilapas sa mga doctor ang iyang privacy tungod sa di ordinaryong sitwasyon nga iyang natagamtaman maong niduol siya sa mga doctor apan nigawas sa maong website ang maong video.

Tungod niini, nangayo og P6 milyones nga danyos batok sa mga doktor nga sila si Alfred Joseph De Leon; Angelo Linawagan; Phillip Leo Arias, Serapio Salazar, Joanne Mae Merilles, Max Joseph Montecillo ug Marlowe Parreno.

Lakip sa gireklamo mao ang mga registered nurses nga sila si Isabelita Remulta, Carmenia Sapio, Consuelo Tecling ug Ida Sumayang, mga clinical instructors nga sila si Ramon Pandaan ug usa ka A. Opado gikan sa usa ka unibersidad ug usa ka nursing aide nga sila si Rosemarie Villareal.

Ang reklamo adto niya gihikay sa Ombudsman-Visayas sa Professional Regulations Commission ug sa Department of Health alang sa kasong administratiba nga miresulta sa tulo ka buwang suspension nila ni Arias ug Montecillo ingon man kang Sapio.

Sumala pa sa hearing officer sa PRC nga si Mildred Antepuesto sa migawas nga mga balita dako ang kahigayonan nga makuhaan og lisensya ang mga doctor ug nurses nga nalambigit sa maong eskandalo kun mapamatud-an.

Hinuon ang mga gipangreklamo pulos mihimakak nga sila maoy mi-upload sa maong video diha sa YouTube.

Bugtong nasayod sa iyang sitwasyon mao si Basak-Pardo barangay captain Dave Tumulak kinsa mao sad ang iyang giduolan kaniadto dihang iyang gireklamo ang pagpanamastamas kaniya ug pagduol niya sa mga doktor.

Dunay mga nanggawas nga mga pagdudang posibleng mga tinun-ang nag internship nga nagdala-dala og mga cellphones nga may mga video-cameras nga bisan sa video footage nga gi-upload sa YouTube makitang nagpunay sila og kuha og video sa ilang mga cellular phones.

Gumikan niini, gidid-an na sa Commission on Higher Education (CHED) ang mga tinun-an sa medical courses nga makadala-dala sa ilang mga cellular phones, camera ug video cameras samtang nag-atiman sa mga pasyente.

Sa pagkakaron ang biktima miangkong di pa gihapon makagawas-gawas ug makapakita sa iyang dagway sa publiko gumikan sa kauwaw nga iyang natagamtaman mugna sa maong eskandalo.

Ang maong eskandalo gihulagway sa mga moralistang Sugbuanon nga usa ka pagpakauwaw sa atong lugar ilabi na nga ang YouTube international ang coverage. (Edwin Ian Melecio)    (BANAT NEWS)