Duha angol sa pagpanunggab

CEBU - Naangol ang duha ka tawo dihang gipanunggab kini sa wala hiilhing mga kriminal sa managkalahing takna ug dapit sa dakbayan sa Mandaue sa miaging gabii.

Ang mga biktima mao sila si Gaudencio Salvador, 35, nga kawani sa Maithland Smith sa MEPZ, dakbayan sa Lapulapu; ug Christopher Monteza, 19, ulitawo nga taga barangay Cabucanal sa lungsod sa Tabogon.

Si PO2 Maniro Lufranco sa investigation section sa Mandaue City Police Office mibutyag sa Banat News nga si Monteza mitambong sa Christmas Party didto sa barangay Pagsabungan sa maong dakbayan.

May usa ka wala hiilhing tawo nga miduol kaniya ug sa walay igong hinungdan kalit siyang gibunalan og basiyo sa beer.

Dihang nabuak ang botelya sa iyang ulo, mao kini gigamit sa criminal sa pagpangluba ngadto kaniya ug gumikan kay wala siya’y kaantigohan sa self defense, nabulit ang biktima sa samad dinunggaban sa nagkalainlaing bahin sa iyang lawas. 

Samtang si Salvador naglakaw sa karsada pauli sa ilang balay kuyog sa iyang kapuyo nga babaye sa zone Ubi sa barangay Paknaan, dakbayan sa Mandaue.

Matud pa ni PO2 Lufranco nga ang suspetsado nga si Tito Alinsug, 48 , nga nagpuyo usab sa maong dapit, ilang gikasugat ug sa walay igong hinungdan milanit kini og kutsilyo ug gihansakan siya. 

Gumikan kay praktisado ang biktima, dali niya kining nasagang apan natapsingan gyud ang  iyang bukton hinungdan sa pagkasamad niini.

Ang duha ka mga samaron gihatod dayon ngadto sa Mandaue City District Hospital ug padayon pa kining giatiman sa mga doktor ug ang kapolisan padayon pa usab sa ilang imbestigasyon. (BANAT NEWS)