Taxi Driver Gitulis, Gigapos

Gibinaklid sa paggapos ug gisulod sa baggage compartment sa tulo ka tulisan ang usa ka taxi driver nga ilang gitulis mga alas 5 pasado sa kaadlawon kagahapon diha sa may North Reclamation Area ning dakbayan sa Sugbu.

Ang drayber giila sa kapolisan nga si Jesus Bauya, 33, temporaryong nagpuyo sa barangay Pulpogan, Consolacion, lumad nga taga Guihulgan, Negros Oriental, drayber sa RSGB Taxi nga nagtangag sa plakang GWT-305.

Samtang ang mitulis niini tulo ka wala pa mailhing tulisan, usa niini nagpaingon sa 40 pataas, itomon, bungoton, nag-purol ug duha ka mga kaubanan niini nga pulos mga batan-ong lalaki.

Si Bauya nga gikahinabi sa Banat News nagkanayon nga gikan siya sa barangay Polpugan, lungsod sa Consolacion kagahapon sa kadlawon nga naghatud sa iyang silingang pasahero diha sa dakbayan sa Mandaue.

Apan human niya gihatod ang iyang silingan didto siya miagi sa may Park Mall alang   sa iyang pagderetso sa dakbayan sa Sugbu apan gawas sa maong Mall didto nang daan ang tulo ka mga tulisan nga mipara ug misakay kaniya.

Apan pag-abot sa may North Reclamation Area, ang bungoton nga tulisan nga diha sa front sent mihangyo kaniya sa pagpahunong sa taxi gumikan kay mangihi kini.

Hinungdan nga iyang gipadaplin ang taxi apan human manaog ang bungoton mituyok kini dayon didto sa iyang pultahan ug giablihan dayon tion sa kutsilyo ug deklarar nga tulis ug pagtuok kaniya.

“Mangihi kuno siya mihunong sab ko wala ko magdahom nga tulis. Paghunong nilipot siya ug giablihan ang purtahan diretso man tuok sa akong liog samtang ang   duha ang migapos ug binaklid sumala pa ni Bauya.

Matud pa niini nga human siya gibinaklid sa paggapos mihangyo siya nga dili lang intawon patyon ug gikuha ang iyang kinitaan nga P1,600.

Apan giyayungan siya ug gisulod sa baggage compartment hinungdan nga wala na gyud siya mahibalo pa niadtong higayona kun mabuhi pa.

“Ang akong huna-huna patay na gyud ko ato maglisod gyud ko’g ginhawa didto sa luyo..init pa gyud kaayo..bag-o pa gyud kung nag-birthday niadtong petsa 25 abi nako katapusan nato nako,” dugang pa ni Bauya.

Apan mga ala una kapin ug kulang kagahapon sa hapon ang mga sakop sa Mobile Patrol Group (MPG) car 002 nakabase sa SRP nakakita sa nahisgutang taxi nga gibilin nag-parking daplin sa dalan sa may dayon nag lugsong sa bridge sa SRP.

Gikatahong nabantayan sa mga sakop sa car 002 nga nag-parking ang taxi nga matud pa buak na ang windshield niini sa dihang gisusi nag-uyog uyog ang baggage compartment ug nahibaw-an nga gisulod ang drayber dihang ilang naablihan.

Ang biktimang drayber gidali sa pagdala sa Mabolo Police Station nga pwerting pagkaluyaha human moabot og walo ka oras sulod sa baggage compartment.

Ang kapolisan nagpadayon pa sa ilang imbestigasyon aron usab sa pag-ila sa tulo ka mga tulisan nga wala gyud mabantayi sa ilang pagpanulis.