5 mil ka baboy naihaw sa Pasko

CEBU - Nasurpresa ang nagdumala sa Cebu City Modern Abattoir nga si Doctor Alice Utlang tungod sa mikapin sa 5 mil  ka mga baboy nga naihaw sa miaging Pasko itandi sa 500 ra sa miaging tuig.

Matud pa ni Utlang nga nakuyawan siya basin maguba ang kahimanan sa ihawan kay puwerti gyung daghana sa baboy nga giihaw niadto lang Disyembre 23.

Nasayran hinuon sa Banat News nga lakip sa mga ni-order og lechon dinhi sa Sugbu mao ang ubang mga molupyo sa Metro Manila.

Kini tungod usab sa ilang kahadlok mugna sa pagkakaplag sa Ebola-Reston virus nga giingong mitakod sa mga baboy gikan sa pipila ka probinsya sa Luzon.

Karon pa lang nakapanglantaw nang daan si Utlang nga ubay-ubay gihapon ang mga baboy nga ihawon diha sa Cebu City Modern Abattoir karong Disyembre 30.

Tungod sa maong kalamboan gipaabot ni Utlang nga mosaka usab ang kita sa ihawan niining buwana ingon man sa kinatibuk-ang tuig.

Nasayran nga sa buwan sa Disyembre sa miaging tuig, ang ihawan mikita lang og P4 milyones ug kini gipaabot nga modobli niining buwana.

Sa pikas bahin gipahibawo usab ni Utlang nga walay hunong ang ilang gihimo nga monitoring sa nagkadaiyang mga lechon dealer ug trader sa siyudad.

Kini aron sa pagsiguro nga limpyo ug luwas sa kontaminasyon ang gipamaligya niining mga lechon ngadto sa publiko.

Ang Department of Veterinary Medicine and Fisheries (DVMF) una nang mipagawas og listahan sa rehistrado ug lihitimong litsonan sa dakbayan.

Subay niini giawhag ni Utlang ang publiko nga adto lang mamalit og lechon, tungod kay kini ilang gipabutangan og inspector nga mosiguro sa limpyo nga pag-asal.   (BANAT NEWS)