Opisyal sa DDB moduaw sa city jail

CEBU - Susihon sa Dangerous Drugs Board (DDB) ang Cebu City Jail karong adlawa uban sa kadagkuan sa Bureau of Jail and Management and Penology (BJMP-7).

Kini subay usab sa taho nga nagpadayon gihapon ang pagpayuhot og ginadiling drugas sulod mismo sa nahisgutang bilanggoan.

Matud ni DDB Vice Chairman Clarence Paul Oaminal nga siya gustong masayod kun unsay gihimo sa nagdumala sa City Jail sa maong problema.

“Naa may mga report nga atong nadawat nga nagpadayon nang pagpasulod og illegal drugs diha sa City Jail, mao nay atong susihon,” sumala ni Oaminal.

Nagkanayon ang DDB vice chairman nga gusto lang niya nga mahatagan og higayon ang Jail Warden nga makapasabot sa precautionary measures nga gihimo niini.

Susihon usab ni Oaminal ang sistema nga gipatuman sa City Jail pagpasulod og mga dalaw nga gituohang maoy magdala sa ginadiling drugas.

 Lakip nga tan-awon ni Oaminal ug kaubanan mao ang mga lugar diha sa nahisgutang bilanggoan nga posibleng maoy kalutsan sa illegal drugs.

Gipadayag hinuon sa hepe sa Intelligence and Investigation sa City Jail nga si SJO1 Neil Rosaroso nga wala na sila makasakmit og shabu gikan sa mga inmates.

Kini sulod sa lima ka greyhound operations nga ilang gipahigayon sukad niadtong Nobiyembre 10 hangtod kagahapong adlawa.

Namatikdan hinuon ni Rosaroso nga ang regulated drugs nga Nubain na usab ang gisuway og palusot sa mga dalaw diha sa City Jail.

Gani niadtong Nobiyembre 27, usa ka Edna Aguila ang ilang nakuhaan og 40 ka ampules sa Nubain nga gisuway niini pagpasulod sa bilanggoan. – BANAT NEWS