Pagbalhin ni Ruiz wa ikabalaka sa kapitan

CEBU - Wala matandog ang grupo sa mga kapitan sa dakbayan sa Lapulapu sa pagduso ni Undersecretary Lito Ruiz sa Department of Interior and Local Government (DILG) og Transfer of Registration records ngadto sa Commission on Elections (COMELEC) sa Lapulapu City.

Matud pa ni Lapulapu Association of Barangay Captains (ABC) President Leo Mercado ang kapitan sa barangay Pajo, nga wala na sila makugang sa maong lakang nga gihimo ni Usec. Ruiz kay dugay nang panahon nga ilang naobserbahan ang iyang laraw sa pagsalmot sa bugnong lugaynon sa piniliay sa 2010 ug magpapili pagkamayor sa dakbayan sa Lapulapu.

Matud pa ni Mercado nga katungod usab ni Ruiz ang paghimo sa maong mga lakang kay mao kini usa sa mga panginahanglan sa COMELEC kung ugaling may plano siyang mosalmot sa politika sa dakbayan sa Lapulapu.

Midugang siya nga bisan tuod kun ang duha sa ilang daang kaalyado nga sila si konsehal Junard "Ahong" Chan ug kapitan Rufo Bering sa barangay Canjulao pulos mipadayag sa ilang pagkaindependente, apan ang mayoriya nilang mga kapitan hugot gihapong mopaluyo sa administrasyon ni Lapulapu City Mayor Arturo Radaza ug sa asawa niini nga si kapitan Paz Radaza sa barangay Mactan.

Kahinumdoman nga si DILG Usec. Ruiz pormal na nga miduso sa iyang "Application for Transfer of Registration Records" ngadto ni Lapulapu City COMELEC Officer Atty. Ann Jeaneth Lamban sa milabay’ng adlaw ug misumiter niini ngadto sa Election Regulatory Board. – BANAT NEWS