Mabdos 6-bulan gipusil, namatay

Patay ang usa ka 25 anyos nga babaye nga nag-mabdos og unom ka bulan human kini gipusil sa wala pa mailhing tawo samtang naglingkod-lingkod sulod sa ilang pinuy-anan didto sa Sitio Guizo barangay Tuburan Sur, siyudad sa Danao sa alas 8:15 sa milabay’ng gabii.

Ang biktima mao si Jocelyn Roble, 25, minyo,   molupyo ra usab sa nahisgutang lugar.

Matud ni SPO4 Edgar Gomez sa Danao City Police Station sa dihang nahinabi sa Banat News subay sa blotter nga gibasehan niini nga si Roble   naglingkodlingkod sulod sa ilang balay human sa panihapon sa dihang usa ka lalaki   ang misekreto og lili sa bintana ug dayong gipusil kini gamit ang wala pa matino nga kalibre sa armas nga gipagimaw lang ang sumbohan agi sa bintana.

Maayong pagka igo ni Roble sa walang bahin sa dughan niini ug diha-diha nahagba sulod sa balay ug daling gitabang sa mga kabanay og silingan niini og gidala sa Danao District Hospital apan gideklarar nga dead on arrival (DOA).

Apan bisan pa og patay na kini gipadali gihapon kini og dala sa mga doktor sa Vicente Sotto Memorial Medical Center (VSMMC) sa pamasin nga maluwas ang unom ka bulan nga bata nga gisabak niini apan namatay usab ang bata paghiabot sa maong tambalanan.

Ang kapolisan padayon pa sa ilang imbestigasyon apan naglisod pagtumbok sa suspek tungod sa kapakyas sa mga saksi nga makahatag og dugang impormasyon aron matumbok ang motibo sanglit usa man ka babaye ang biktima ug buntis pa gyud kini.