Mag-uuma, anak gi-ambush

CEBU - Patay diha diha ang usa ka 38 anyos nga mag-uuma ug kritikal ang kahimtang sa 12 anyos niining anak dalagita human kini gibanhigan samtang paingon mopauli gikan sa ilang umahan sa bukirang bahin didto sa Sitio Sto. Niño, barangay Linut-od lungsod sa Argao niadtong Lunes sa alas 5:30 sa hapon.

Ang biktima nga mag-uuma nga patay diha diha human maka-angkon og napulo ka mga samad pinusilan sa dughan ug abaga mao si Reynaldo Dana, 38, usa ka mag-uuma ug molupyo sa barangay Manlapay lungsod sa Dalaguete samtang ang dalagita nga anak niini nga kritikal ang kahimtang human makaangkon og duha ka samad pinusilan sa dughan mao si Josephine Dana, 12.

Matud ni PO1 Rodrigo Teo sa Argao Police Station sa dihang nahinabi sa Banat News subay sa blotter nga gibasehan niini ang mga biktima gikan nga nagsusi sa mga mais nilang tanom sa ilang umahan sa barangay Linut-od ug paingon na unta kining mamauli dihang giatngan sa wala pa mailhing suspek ug gipusil gamit ang shotgun pag-agi nila sa maong lugar.

Patay diha diha ang amahan human mabulit ang dughan niini sa mga bolitas sa shotgun nga dunay unom ka samad ug laing upat sa abaga samtang ang anak niining dalagita gitabang na lang sa mga molupyo sa maong lugar human sa hitabo ug gidali pagdala sa Alcantara Hospital human makaangkon og duha ka samad sa dughan apan gibalhin usab dayon sa tambalanan dinhi sa dakbayan sa Sugbo ug kretikal ang kahimtang.

Ang kapolisan pabilin pang blangko pagtumbok sa suspek ug motibo sa krimen tungod kay matud ni PO1 Teo, ang mga silingan sa biktima pulos kini namahayag nga walay kontra ang biktima sa ilang lugar.

Hinuon dunay usa ka suspek nga gitumbok sa mga molupyo sa maong lugar apan padayon pa kini karong gisusi sa kapolisan pagtino kun may kalambigitan kini sa krimen. – BANAT NEWS