Dalagita naunay sa pusil sa amahan

CEBU - Nakaangkon og samad pinusilan ang usa ka 16-anyos nga dalagita human kini nanghipos sa panapton nga gibutang sa lamesa nga iyang gituohan nga labhanan apan gipostan diay sa armas sa iyang amahan nga konsehal ang natagak ug aksidenting nibuto didto sa barangay Kaorasan lungsod sa Tuburan niadtong Biyernes sa alas 6:30 sa gabii.

Ang maong lugar usa ka bukirang bahin sa maong lungsod ug boundary na kini sa dakbayan sa Danao.

 Si Inspector Carlos Reyes Jr., hepe sa kapolisan sa lungsod sa Carmen mao nay nipahibawo sa kapolisan sa Tuburan sa maong panghitabo human malandig sa Danao City Hospital ang maong menor.

Ang biktima anak ni Konsehal Pedro Matugas sa barangay Kaorasan.

Matud ni SPO2 Carlo Canseko imbestigador sa Tuburan Police dihang nahinabi sa Banat News nagkanayon nga gipunit sa biktima ang panapton nga gipustan sa kalibre .38 nga revolver sa pagtuo nga labahan kini apan natagak kini sa sawog ug mibuto ang nahisgutang pusil ug naigo ang walang kamot sa menor.

Si Matugas ang giingong nimando sa iyang asawa nga si Rosalina paglabay sa maong armas nga taya-on na sa pagtuo nga dili na kini mubuto.

Gitug-an ni Kagawad Matugas atol sa pagsukit-sukit sa kapolisan nga ang maong pusil ang binilin lang sa iyang ig-agaw nga nilarga ngadto sa Mindanao ug wala na mobalik. – BANAT NEWS