Bank security higpitan

CEBU - Bag-ong hepe sa Talisay police station mopahigpit sa seguridad sa mga establisamento dakbayan agi’g pagpangandam batok sa mga tulisan ilabi na sa mga bangko ug dagkong tindahan.

Si Senior Inspector Jovito Canlapan nagkanayon nga ang unang kamandoan ni Supt. Henry Biñas isip bag-ong hepe sa dakbayan mao ang pagpahigpit sa pagbantay sa mga bangko ug mga balay patigayon tungod sa umaabot nga kapaskuhan.

Kini tungod sa naobserbahang pagsaka sa porsiyento sa krimen ning mga panahuna ug usa sa mga napanglantawang posibleng mga target mao ang mga bangko ug dagkong tindahan.

Dugang pa niini mao ang pagpahingusog sa roving patrols sa kadalanan ilabi na sa barangay Tabunok nga maoy sentro sa dakbayan sa komersyo lakip na lokasyon sa 20 ka mga bangko.

Gibutyag ni Canlapan nga ang kadagkoan sa Cebu Bankers Club nangayo   usab kanila og dugang seguridad sa ilang mga miyembrong bangko.

Gawas pa niini sigehon usab sa kapolisan ang pagbutang og mga random checkpoints batok niadtong mga criminal nga magsakay og motorsiklo. - Brenda Batuto (BANAT NEWS)