Drayber sa bus sa Suroy-Suroy ni Gwen patagmon

CEBU - Hatagan og leksyon sa kapulisan sa lalawigan sa Sugbu ang driver sa Ceres Bus nga namakak aron lang masalbar sa tulubagon niini sa nabuak nga bildo sa bintana sa pag-ingong gibato sila atol sa Suroy-Suroy sa Sugbu uban ni Gov. Gwendolyn Garcia niadtong milabay'ng Domingo.

Nasayran nga ang driver nga si Valentine Kindica mipahibalong gibato ang ilang sakyanan atol nga nagkaguliyang dihang si Garcia giatake sa usa ka Archimedes Reroma atol sa pakiglamano niini sa gobernador diha sa dakbayan sa Naga.

Apan nasayran nga wala diay kini labaya og bato kay nasipyat ra si Kindica sa iyang karkulasyon pagliko niini ug naigo ang usa ka tindahan, sumala pa ni Sr. Supt. Carmelo Valmoria, hepe sa kapulisan sa lalawigan sa Sugbu.

Matud pa niini nga magsilbeng leksyon kini niadtong mga driver nga mamakak nga gusto lang makalusot sa ilang responsibilidad hinungdan nga para kaniya angayang patagmon.

“Ang ato diri pagtino lang sa tinuuray'ng hinungdan kun nganong gilabay nga duna man untay igong security nga akong gipabutang didto sa dapit,” matud pa ni Valmoria.

Dugang pa niini nga moduso usab sila’g report sa ilang imbestigasyon ngadto na sa mga tagdumala sa Ceres Bus aron usab ma-aware kini sa dili maayong binuhatan sa ilang driver.

Ang Banat News nakakuhag impormasyon gikan sa usa ka sinaligang tinubdan nga si Kindica ang gikatahong gitangtang na sa Ceres Bus isip driver. - Guam Logroño (BANAT NEWS)