CEBU - Usa ka pari sa parokya sa Toledo City nakadasmag patay og usa ka 31 anyos nga lalake didto sa Duterte street, barangay Guadalupe ning dakbayan sa Sugbo, kagahapon sa alas 2:30 sa kaadlawon.
Ang biktima mao si Alexander Suerte, 31, nga taga Salvador Extension, Labangon ning dakbayan, samtang ang suspetsado nailhan usab nga si Padre Raul J. Gallego, sa Saint John of Sahagon Parish sa Toledo City.
Ang traffic enforcer sa City Traffic Operations and Management (CITOM) nga si Manuel Tagaan mibutyag sa Banat News nga samtang nagpadagan sa iyang motorsiklo ang biktima didto sa eskina sa dalan Duterte, nagkasugat kini og ang awto nga gimaneho ni Padre Gallego.
Gumikan sa kakusog nga pagkadasmag, nalagpot ang biktima ug sa pagtugpa niini sa sementadong karsada dihadiha nabugtoan sa iyang kinabuhi.
Mitahan dayon ang pari ngadto sa kapolisan, apan human kini magkasinabot ug ang mga tagtungod sa biktima, gibuhian lang usab dayon kini sa kapolisan. – BANAT NEWS