CEBU - Hayan dawaton ni acting Mayor Michael Rama ang resignation letter ni City Planning Officer Nigel Paul Villarete kun kini moluwat sa katungdanan.
Kini maoy gibutyag sa usa sa mga staff ni Rama subay usab sa taho nga si Villarete uban kang City Administrator Francisco Fernandez mo-resign sa ilang trabaho.
Ang tinubdan wala hinuon motug-an bahin sa habig ni Fernandez apan kini midugang nga dako ang posibilidad nga hangpon sa acting mayor kun si Villarete moluwat sa katungdanan.
Gipasabot sa tinubdan nga pipila ka tigum na ang gipatawag ni Rama nga wala tungaha ni Villarete bisan kun gikinahanglan ang presensya niini.
Laing tinubdan usab ang mibutyag sa Banat News nga si Villarete misugilon nga kini dili mangampanya kang Rama sa umaabot nga eleksyon.
Ang City Planning Officer giingong adto unya mangampanya sa dakbayan sa Mandaue sa 2010 elections sa kandidato nga iyang suportahan.
Gitataw hinuon ni Rama nga dili isyue ang gikatahong pagluwat sa katungdanan sa pipila ka opisyal sa City Hall bisan kun kini courtesy resignation lang.
“As far as I’m concerned it is a non-issue, everybody is requested, enjoined to be working as one now,” sumala sa acting mayor.
Midugang si Rama nga walay angayang moluwat sa katungdanan tungod kay siya maka-adjust ni bisan kinsa sa bisan unsa nga panahon apan giklaro sa acting mayor nga siya kinahanglang pahibaw-on usab kun dunay mga opisyal nga dili maka-adjust kaniya.
“Let me know so that we will look for another one,” nagkanayon si Rama nga nakapaturok usab sa landong sa katahap.
Pipila ka mga kawani sa City Hall mipadayag sa ilang kawili kang Fernandez kung tinud-on niini ang pagluwat sa katungdanan karong Disyembre 9.
Nasayran nga si Fernandez co-terminos sa mayor samtang si Villarete gikataho nga usa na ka regular nga kawani sa City Hall. (BANAT NEWS)