Chairman sa SK sa Pari-an gi-ombuds sa kapitan

CEBU - Gipasakaan og reklamo ni Kapitan Mark Balaga sa Pari-an ngadto sa Ombudsman Visayas ang ilang SK chairman nga si Mat Eric Medalle.

Kini tungod sa giingong paggamit sa SK official sa multicab sa barangay alang sa personal niining lakaw niadtong Oktobre 31.

Ang mga SK officials sa Parian niadto sa dakbayan sa Bogo sa maong adlaw tungod sa gitambungan niining kalihukan sa usa sa mga barangay sa nahisgutang siyudad.

Apan ang nakapasamot sa kasuko ni Balaga sa iyang SK chairman mao ang danyos nga nahiaguman sa multicab.

Nadumbolan ang maong sakyanan nga gisakyan ni Medalle ug kaubanan dihang naputol ang timing belt niini taliwala sa karsada.

Kini ang hinungdan nga nabuak ang suga ug nalumping ang luyong bahin sa sakyanan mugna sa maong insidente.

Gusto ni Balaga nga paimbestigahan sa anti-graft office si Medalle tungod sa giingong “unbecoming behavior” niini.

Kini gikasurpresa sa SK chairman tungod kay giingong opisyal ang ilang lakaw ug siya dunay pruweba nga ila sa SK ang maong sakyanan.

Wala hinuon mabalaka si Medalle sa reklamo nga ilang giatubang tungod kay kini giingong walay igong kapasikaran ug basehanan.

“Moingon siya nga personal use, siya may naghupot sa yawe sa sakyanan nganong iya mang gihatag kung nasayod siya nga personal tong among lakaw,” sumala ni Medalle.

“Naa sab koy proof nga ang multicab iya sa SK sa barangay unya wala nila i-turn-over namo, wala ra ba diay nay rehistro,” dugang pamahayag ni Medalle.

Nagtuo ang SK chairman nga politika maoy hinungdan sa pagpasaka og kaso ni Balaga kaniya tungod kay iyang napildi ang kandidato niining SK sa nakalabay nga eleksyon. - Elly Bolonos (BANAT NEWS)