CEBU - Magtiayong gipasanginlang pinanser sa masiao gidakop sa mga sakop sa Provincial Intelligence Branch (PIB) sa Cebu Provincial Police Office sa miaging gabii diha sa barangay Malhiao lungsod sa Badian.
Milanat pa og pipila ka oras una pa nila masikop ang magtiayong Paracuelles nga si Vicente, 52, ug Dina, 50, sa grupo ni Chief Insp. Ma. Elma Delos Santos mironda sa ilang balay pinasubay sa Search Warrant nga giisyu ni Judge Geraldine Faith Econg tungod sa pagdumili nila pagpasulod sa mga polis.
Nakuha nga mga ebidensya ang P20,842.75 nga mga sensilyo ug lakip na ang papel niini nga tag P20; usa ka motorsiklo ug fax machine laing nakuha ang tally sheet ug uban pang masiao paraphernalia.
Matud ni Delos Santos nga duha sa iyang sakop ang naangol kay napugos na lang og katkat sa koral nga gibutangan diay og live wire.
Giingong naabtan pang nag-tally sa mga numero ang magtiayon pasado alas 10 sa gabii apan wala sila makasulod dayon tungod sa mga dagkong binuhing iro.
Ang bana diriyot unta makaikyas human misawom sa dagat apan may tawong nakatug-an sa mga polis maong ilang giatangan hangtud sa kaadlawon dihang mikawas na kini nga nagkurog-kurog sa katugnaw ug nangayo og sapot.
Nidugang si Delos Santos nga gikan sa Lungsod sa Moalboal hangtud na sa Santander maoy operasyon sa magtiayon. (BANAT NEWS)