Caravan sa Talisay gisaway

CEBU - Kanhi kandidato sa pagka-mayor sa dakbayan sa Talisay misaway sa gipahigayong caravan kagahapon sa hapon sa mga kapitan sa kabarangayan sa dakbayan sa Talisay agi’g pagsupak pagpa-recall kang Mayor Socrates Fernandez ug gihulagway nila kining nag-usik lang sa panahon ug kwarta.

Si Johnny delos Reyes sa pakighinabi niini sa Banat News miingon nga nasayod nang daan ang mga kapitan nga dili gyud ma-recall ang mayor tungod kay ang Comelec walay budget niini.

Maong ang caravan nga gisalmutan sa 22 ka kapitan ug ilang mga kawani lakip na pribadong sektor kagahapon pag-usik-usik lang sa panahon ug kwarta.

Gibutyag hinuon ni delos Reyes nga padayon ang signature campaign sa recall sa mayor ug nangangkon sobra na kini sa 5 mil apan mipadayag nga nasagmuyo sila sa pahibalo sa Comelec nga way pundo alang niini.

Si Osmundo Manreal Jr. presidente sa Association of Barangay Captain (ABC) sa pakighinabi niini sa Banat News kinsa maoy nangulo sa caravan nagkanayon nga kaugalingong pagbuot sa mga kapitan ang ilang pagkuyog ingon man sa ubang tigsuporta sa mayor bisan sa mga kontrobersya.

Wala hinuoy namugnang paghuot sa trapiko ang maong kalihukan tungod sa kadaghan sa mga gi-deploy nga traffic enforcers. - Brenda Batuto (BANAT NEWS)