Mga armas dad-on Masbate 'sakpan

CEBU - Nasikop ang usa ka lalaki nga nagdala’g mga high-powered nga armas ug daghang bala sa dihang mosakay na unta sa pumpboat paingon sa lalawigan sa Masbate diha sa Bogo Wharf sa barangay San Vicente sa dakbayan sa Bogo niadtong miaging buntag sa alas 10 ang takna.

Ang kapolisan sa Bogo Police station nakadawat og report gikan sa ilang intelligence kabahin sa usa ka tawo nga kadudahan ang linihukan nga paingon mosakay og pumpboat paingon sa Masbate.

Daling giadto sa mga polis pinangulohan ni SPO4 Jose Medrano ug mga kauban ug ilang naabtan ang usa ka lalaki nga nagdala og dakong bag nga naila nga si Gerry Solasco, 30, taga Poblacion Cataingan Masbate.

Sa dihang girekisa ang bag ni Solasco didto sa sulod ang pito ka .45 pistol, usa ka KG-9 submachine pistol, duha ka magazine sa KG-9, usa ka silencer, 17 ka magazine sa .45 pistol, ug 14 ka buhing bala sa 45 nga pistola.

Si PO3 Allan Dosdos sa Bogo City Police station mitug-an sa mga tigbalita kagahapon nga ila nang gipasakaan og kasong kalapasan sa 8294 kon illegal possession of firearms si Solasco diha sa Bogo Prosecutors Office.

Apan niingon si Dosdos dili sila kombinsido sa pangan ug apelyedo sa suspek tungod kay nagduda silang nangalyas kini ug kini nangangkong igo rang gisugo.

Atol sa pagkasikop sa suspek walay nakuhang bisan usa nga identification diha sa iyang bulsa sanglit niadtong higayona matud ni Dosdos nga nagsul-ob ang suspek og fatigue nga karsones nga mora gyud og militar ang pamayhon niini. – BANAT NEWS