CEBU - Mga kapitan sa 22 ka barangay sa dakbayan sa Talisay mopahigayon og caravan karong Sabado sa hapon pagpakita og suporta kang Mayor Socrates Fernandez.
Si Osmundo Manreal Jr. presidente sa Association of Barangay Captains (ABC) sa pakighinabi niini sa Banat News mibutyag nga supak sila sa pagpa-recall sa mayor.
Matud niini nga ang pagpahigayon og recall nag-usik lang kini sa kwarta ug panahon. Giingong ang mga isyu kabahin sa anak ni Fernandez nga si Joavan maoy usa sa gituuhang hinungdan sa maong lakang gawas pa sa ubang rason kabahin sa mayor.
Si Manreal ang miawhag ngadto sa publiko nga hatagan na lang og higayon ang mayor nga mahuman ang termino niini sa iyang posisyon hangtud sa tuig 2010.
Kahinumduman nga ang whistle blower nga si Crisologo Saavedra ang nagpaluyo sa pagpa-recall sa mayor ug ang kanhi kandidato sa pagka-mayor sa dakbayan nga si Johnny delos Reyes mipahigayon sad og signature campaign diha sa Talisay alang niini.
Lakip sa mokuyog sa caravan ang ubang mga opisyal sa mga barangay ug ang mga Barangay Health Workers ug gilauman usab nga adunay musalmot nga mga pribadong indibidwal. - BANAT NEWS