CH makig-atubang sa Hunta bahin sa Zoo

CEBU - Tubagon sa kagamhanan sa dakbayan sa Sugbu ang resolusyon sa Hunta Probinsyal ingon man ang suwat ni Gobernadora Gwendolyn Garcia may kalabutan sa pagputol ug pag-withdraw sa kagamhanan sa lalawigan sa pagtugot niini nga magamit ang luna sa nahimutangan sa Cebu City Zoo.

Ang pito ka ektaryang luna sa probinsya nga gigamit karon sa zoo gitinguhang bawion sa Kapitolyo tungod kay kini gamiton aron tukoran og Women’s Crisis Center building.

Apan matod ni acting vice mayor Hilario Davide III nga dili biyaan sa dakbayan ang maong luna nga gitukuran sa zoo.

Gani nitataw si Davide nga ila nang giandam ang tubag sa City government nga ila usab nga ipadangat ngadto sa Kapitolyo.

“Amo nang giandaman og tubag kay ang position sa siyudad is magpabilin ta diha, we will maintain the zoo gihapon,” sumala ni Davide.

Ang City Attorney’s Office maoy gisangunan sa acting vice mayor pag-ukay sa mga dokumento nga magsuporta sa baruganan sa kagamhanan sa dakbayan.

Sa samang higayon niingon si Davide nga si City Atty. Rodolfo Golez maoy ilang gitugyanan sa paghimo og tubag sa suwat sa probinsya.

Matud sa acting vice mayor nga ang pagpanalipod sa luna nga giukupahan sa zoo maoy usa sa gitogon ni Mayor Tomas Osmeña kaniya nga ilang atimanon.

Kini samtang magpatambal pa ang mayor ngadto sa Estados Unidos tungod usab sa iyang sakit nga urinary bladder cancer.

Una nang gipadayag ni Osmeña nga ang kamanduan lang sa korte maoy makapugos sa siyudad pagtugyan sa maong luna ngadto sa probinsya. (BANAT NEWS)