Patay sa hit and run

CEBU - Patay ang usa ka 20-anyos nga batan-ong lalaki human kini madasmagi sa hit and run nga sakyanan sa iyang paglabang sa karsada sa barangay Inayagan siyudad sa Naga niadtong Domingo sa alas 9:00 sa gabii.

Ang biktima nga namatay mao si Alfred Callet, 20, taga Tayasan Negros Oriental apan kasamtangang nagpuyo sa maong lugar ug nagtrabaho isip helper sa Bernadeth Lechon Manok sa lungsod sa Minglanilla.

Matud ni PO2 Miguel Castañares, duty desk officer sa Naga City Police dihang nahinabi sa Banat News wala pa makit-i ang sakyanan nga nakadasmag sa biktima human nisibat human madasmagi ang batan-on padulong sa habagatang bahin sa Sugbo.

Ang kapulisan sa Naga daling nakig-alayon sa kapulisan sa lungsod sa San Fernando aron masikop ang sakyanan apan pakyas kini.

Matud ni PO2 Castañares pabilin pang blangko ang ilang buhatan pagtumbok sa nakadasmag nga sakyanan ug gipaabot nalang nila karun nga dunay mga nakasaksi sa hitabo ang mopatim-aw sa ilang buhatan aron makahatag nila og impormasyon.

Ang biktima nakaangkon og dakong pangos sa ulo nga gituohang gilatayan sa ligid ingon man sa tuong bahin sa lawas niini ug lama sa dugo sa karsada.  (BANAT NEWS)