2 naghikog bisperas sa Adlaw sa Minatay

CEBU - Duha ka kaso sa paghikog ang nahitabo ning dakbayan ug lalawigan niadtong Biyernes, bisperas sa Adlaw sa mga Minatay.

Ang mga nagpamakamatay nga tinuyo sa ilang kaugalingon nailhan nga mao sila si Severino Gelbolingo, 58, nga taga sitio Katangkungan, Basak-Pardo, Cebu City ug Ruben Libre Montebon, 54, minyo, nga taga barangay Poblacion, lungsod sa Sogod, Cebu.

Si Gelbolingo nakit-an sa mga kabanay ug silingan nga patay na nianang alas 12:10 sa kaadlawon niadtong Biyernes nga nagkumbabit sulod sa iyang balay.

Nakita sa mga kabanay ug kapolisan nga gihiktan og pisi ang liog niini kansang pikas tumoy gigaid sa sagunting sa iyang balay.

Samtang si Montebon, baho na ug padulong na sa pagkadugta ang patay'ng lawas niini dihang nakit-an kini nga nagbitay usab sulod sa ilang ancestral house niadtong Biyernes sa alas 11:17 sa buntag.

Sa bahin ni Gelbolingo, ang mga kabanay ug silingan niini wala makamatikod nga aduna kini suliran busa nakurat sila dihang nasayran nilang nagpakamatay kini.

Hinuon gisuta sa kapolisan nga walay foul play ang kamatayon niini.

Samtang si Montebon gibutyag sa iyang mga kabanay ug mga paryente nga milili sila sa balay niini niadtong Biyernes sa buntag kay nanimaho mang patay ang palibot niini ug dugay-dugay na usab nga wala nila kini makita.

Apan maoy misugat sa ilang mga mata nga nagbitay na kini sa pisi nga gihikot sa iyang liog kansang pikas tumoy gigaid sa decorative hollow block nga bongbong sa iyang balay.

Hinuon ang kapolisan walay nakitang foul play sa kamatayon ni Montebon ug gituohan nila nga ang pagpakamatay niini naggumikan malagmit sa bug-at niyang problema. – BANAT NEWS