CEBU - Dugang mga kabanay ug pamilya sa mga biktima sa nalunod nga M/V Princess of the Stars ang nahatagan sa burial ug financial assistance sa kagamhanan sa dakbayan.
Mga tagtungod sa 19 ka mga pasahero sa nalunod nga barko nga mga mulopyo sa siyudad ang gihatagan sa tag-P5 mil nga burial assistance kagahapon sa Cebu City Hall.
Samtang laing tulo ka tagtungod ang nakadawat usab kagahapon og tag-P10 mil nga financial assistance gikan sa siyudad.
Kini tungod kay ang mga pasahero nga sila si Glen Alvarez, Fernando Villar ug Lorenzo Garces giingong mga breadwinner ug maoy gisaligan sa ilang pamilya.
Matod sa administrative officer sa Department of Social Welfare and Services (DSWS) sa City Hall, Lucy Mahusay, nga mukapin na sa usa ka gatos ang ilang nahatagan og assistance.
Apan giklaro ni Mahusay nga duna pay mga pamilya sa mga biktima sa nalunod nga barko nga mga mulopyo sa dakbayan ang wala pa gihapon makadawat sa hinabang pinansyal.
Kini tungod sa giingong kakuwang sa mga dukumento nga ilang gipangayo alang sa pag-release sa financial assistance. Nasayran gikan sa DSWS nga mukapin sa 130 ka mga pasahero sa M/V Princess of the Stars ang nalista niini nga mga mulopyo sa siyudad.
Tag-P5 mil ang ihatag sa dakbayan nga hinabang pinansyal ngadto sa tagtungod niini samtang P10 mil usab sa pamilya sa mga biktima nga maoy breadwinner. – BANAT NEWS