CEBU - Usa sa labing idlas nga tulisan dinhi sa dakbayan sa Sugbu ang nadakpan sayo kagahapon sa buntag sa mga sakop sa Task Force Motorcycle sa kapolisan sa dakbayan diha sa may dalan Martirez, M.J. Cuenco barangay Tejero.
Si Edison “Bobit” delos Santos, 39, taga barangay Tejero nadakpan sa task force nga gilangkuban nila ni SPO1 Adonis Dumpit mga alas 9 sa buntag kagahapon sa dihang nasigpatan samtang nag-roving sila sa nahisgutang lugar.
Si SPO1 Dumpit nga gikahinabi sa Banat News nagkanayon nga sa dihang ilang nasigpatan si delos Santos ila kining gisita ug girikisa diha-diha og .22 rebolber nga black widow, 12 ka bala, duha ka stick sa marijuana ug gituohang mga shabu.
Si Dumpit mikonpirmar nga si delos Santos maoy usa sa mga idlas ug banggiitang tulisan sa dakbayan sa Sugbu gumikan usab kay makigpinusilay kini sa mga polis nga moresponde batok niini.
Si delos Santos nasutang napriso gumikan sa kasong frustrated homicide niadtong Hunyo 12, 2004 human gipusil niini ang kanhi polis nga si SPO3 Danilo Fabian ug laing kauban hinungdan nga napriso kini og upat ka tuig sa Cebu City Jail..
Gitug-an ni Dumpit nga iyaha na kining napusilan niadto human gisuwayan niini sa pagsunog ang pipila ka mga panimalay diha sa barangay Tejero apan gisuwerte kay wala maigo.
Samtang ang suspetsado nga gikahinabi sa Banat News hugtanong nihimakak sa pasangil ug miakusar nga planted ang maong mga ebidensya. (BANAT NEWS)