4 lang ka titser sa Buot-Taup gipatubag sa prinsipal

Nakasumiter na sa iyang investigation report ang district supervisor sa Emilio Osmeña Integrated School sa barangay Bout-Taup ning siyudad sa Sugbu nga si Febelyn Bendolo.

Si Bendolo maoy gisangunan ni Wilfredo Tano, officer in charge sa Cebu City Schools Division pagpahigayon og imbestigasyon sa mga magtutudlo diha sa nahisgutang tunghaan.

Kini tungod usab sa taho nga sayong mamauli ang maong mga magtutudlo sa matag adlaw nga Biyernes ug dugay usab motunga sa adlaw’ng Lunes.

Matud ni Tano nga sa gisumiter nga report ni Bendolo, upat lang sa 16 ka mga magtutudlo ang nasuta nga mipauli og sayo niadtong miaging Oktobre 17.

Kini mao sila si Rose Cortes, Cristina Pugoy, Mae Ylaya, ug Yeda Rosero nga giingong gipatubag na usab sa ilang prinsipal sa gihimo niini.

Apan laing upat usab ka mga magtutudlo wala sa ilang tagsa-tagsa ka classroom sa maong adlaw tungod sa pipila ka rason.

Usa ka magtutudlo ang mipalta sa trabaho tungod kay giingong mikuha sa final examination sa iyang graduate studies.

Samtang ang laing tulo ka magtutudlo giingong miuban sa pito ka mga tinun-an niini nga misalmot sa District Science Fair atol sa maong adlaw.

Wala usab sa nahisgutang tunghaan niadtong Oktobre 17 ang prinsipal nga si Floreiphine Navarro tungod kay miapil og career guidance seminar.

Nagkanayon si Tano nga ang report ni Bendolo iyang iduso ngadto sa Investigation Committee sa Cebu City Schools Division nga gipanguluhan ni Salustiano Jimenez.