Kagawad ug mga tanod misibog pagkiha sa 'nagmaoy' nga polis

CEBU – Gisibog sa usa ka konsehal sa barangay ug tulo ka mga tanod ang kasong grave threats nga ilaha untang gipasaka batok sa usa ka polis nga nagwara wara sa iyang armas dungan ang pagpangita og away diha sa karsada sa Poblacion lungsod sa Sibonga usa ka adlaw sa dili pa kini pormal nga moretiro sa serbisyo niadtong petsa 15 niining bulana.

Si SPO1 Cedric Lagahid pormal nang niretiro sa serbisyo sugod niadtong petsa 16 ning bulana una nang gireklamo ni Poblacion barangay kagawad Matso Natividad ug mga tanod nga sila si Raul Padogdog, Eliezar Blanco ug Wilson Bacusmo gumikan sa maong hitabo ug gipa-blotter sa Sibonga Police Station.

Apan nasayran sa Banat News gikan ni PO2 Ederlino Bacusmo sa Sibonga Police dihang nahinabi ning tigbalita nga pormal nga nipatim-aw sa ilang buhatan si Natividad ingon man ang tulo niini ka mga tanod ug niduso og affidavit of desistance pagmatuod nga dili na sila interesado pa nga ipadayon ang maong kaso human sila magka-areglo ngadto ni SPO1 Lagahid.

“Naluoy siguro sila nga dili siya makadawat daghan ra bang mga utang utang ug loan nga bayranan,”dugang ni PO2 Bacusmo.

Matud ni PO2 Bacusmo nga andam na gyud unta ang mga affidavit sa kaso nga ipasaka batok ni SPO1 Lagahid niadtong tungura apan napugngan kini human niabot sa ilang buhatan ang mga reklamante nga nagpahibalo nga dili nalang nila ipadayon pa ang maong kaso.

Wala hinooy kalibutan si PO2 Bacusmo kun duna bay binayranay nga nahitabo bugti sa pagsibog sa kaso.

Sila si Natividad ug ang mga tanod maoy nibadlong ug nidakop ni SPO1 Lagahid nga nisukol pa niadtong higayuna nga nagbitbit sa armas ug nagpasalba pa nga nangita og away tungod sa kahubog.

Si SPO1 Lagahid nadestino usab sa Sibonga Police sa wala pa kini moretiro niadtong petsa 16 ning bulana. – BANAT NEWS