Seniors supak sa recall ni Soc

CEBU - Mga miyembro sa Talisay City Federation of Senior Citizens Association of the Philippines, Inc.   mipadayag sa ilang pagsupak sa pagpa-recall kang Mayor Socrates Fernandez apan ila usab nga gisaway ang sobrang pagpangga sa sinagop sa mayor nga si Joavan.

Si Ruperta Olandag, presidente sa nahisgutang federation sa gipahigayong press conference kagahapon sa buntag diha sa ilang buhatan sa barangay Poblacion mipadayag nga ang federation nga adunay 2,532 ka mga miyembro sa 22 ka barangay, duha lang sa nahisgutang barangay ang wala mosuporta sa resolusyon.

Matud sa grupo nga dunay mga pribadong indibidwal ug mga politiko nga nagpaluyo sa pagdaot kang Mayor Fernandez.

“Bisan kinsa man tingali nagmahal ta sa atong anak pero not in that way nga ang imong anak nga dautan og buhat imo gyud nang badlongon,” ni Olandag pa.

Si Olandag miawhag kang Mayor Fernandez nga mangita og mga sakop sa relihiyosong pundok nga mohatag og maymay kang Joavan ug duha sa iyang gitumbok nga angayang duolon sa mayor mao sila si Arsobispo Ricardo Cardinal Vidal ug Monsignor Esteban Binghay.

Si Romeo Martinez kinsa retiradong direktor sa Department of Interior and Local Government (DILG) sa dakbayan sa Mandaue ug kalihim sa federation nagkanayon nga walay igong basehan ang pagpa-recall kang Mayor Fernandez.

Apan matud niini nga usa ka “unethical” ang giingong pagpatrabaho sa mayor sa mga giingong biktima ni Joavan ug paghatag usab og kwarta ngadto sa mga biktima. – BANAT NEWS