Badlongong mga armored car di motuman sa traffic rules

CEBU - Nangreklamo na ang mga traffic enforcer sa dakbayan sa Sugbu tungod sa giingong badlongon nga mga drayber sa mga armored car.

Kasagaran sa mga drayber sa nahisgutang mga sakyanan gireklamo tungod kay gikatahong kanunay nga molapas sa mga lagda sa trapiko.

Tungod niini, gipatawag sa City Traffic Operations and Management (Citom) ang presidente sa Cebu Bankers Armored Car Providers nga si Danny Rodis.

Matud ni Citom executive director Arnel Tancinco nga ilang gipahinumduman si Rodis nga dili exempted ang mga armored car sa traffic rules and regulations.

“Nagsigi man og panakop ang atong mga traffic enforcer sa mga armored car pero mupaturatoy man lang og dagan dili man mohunong,”sumala ni Tancinco.

Miingon si Tancinco nga lakip sa mga lagda sa trapiko nga sagad malapas sa mga armored car mao ang nagkadaiyang mga traffic sign diha sa kadalanan.

Kini sama sa no left turn, no U-turn, no parking, ug uban pang mga signage nga giingong gibaliwa lang sa mga drayber og armored car.

Nagkanayon si Tancinco nga subli nilang ipatawag ang mga armored car provider kun padayon nga lapason sa mga drayber niini ang traffic rules and regulations.

Gusto sa executive director sa Citom nga ang grupo mismo sa mga armored car provider maoy modisiplina sa ilang mga sakop.

“Sigihan lang gihapon nato sila og pahimangno, apan kun magpadayon silang molapas sa mga lagda sa trapiko ato nga i-impound ilang mga sakyanan” miingon si Tancinco. – BANAT NEWS