CEBU - Dili supak ang Archdiocese of Cebu nga dunay ipahigayong recall election batok kang Talisay City Mayor Socrates Fernandez.
Ang mayor nga opisyal usab sa Catholic Faith Defender gitinguha karon sa pipila ka individual nga ma-recall tungod sa pipila ka mga pasangil.
Usa niini mao ang giingong paggamit sa buhatan ug impluwensya ni Fernandez pagpanalipod sa iyang kontrobersyal nga anak nga si Joavan.
Matud sa tigpamaba sa Archdiocese of Cebu nga si Msgr. Achilles Dakay nga ang pagpasiugda og recall petition usa ka katungod ug dili mahimong pugngan.
Kini ilabi na kun nakita sa mga nagpasiugda nga dunay nahimong kahiwian ang hingtungdang opisyal nga dili angayang pasagdan.
Ang gusto lang ni Dakay nga mahitabo nga klarohon ang pagpahigayon sa proseso ug walay trampas o maniobra nga mahitabo.
Gitataw ni Dakay nga walay angayang kabalak-an si Mayor Fernandez sa recall petition kung kini walay nahimo nga kahiwian.
Target sa mga organizer nga gipanguluhan ni Crisologo Saavedra nga mohipos og 20 mil ka mga pirma gikan sa 94 mil ka mga botante sa nahisgutang dakbayan.
Kung makuha ang gikinahanglang 15% sa registered voters, posibleng dunay mapahigayon nga eleksyon sa Talisay sa hinapos nga bahin niining tuiga o sa sayong bahin ba hinoon sa sunod tuig. (BANAT NEWS)