Siga sa Camputhaw gitumba sa nag-motor

CEBU - Usa ka siga sa barangay Camputhaw nga bag-uhay lang nakagawas sa bilanggoan gibuk-an sa iyang ulo sa duha ka mga mamumunong nagsakay og motorsiklo kagahapon sa alas 11:24 sa buntag diha sa F. Sotto Drive barangay Camputhaw ning dakbayan.

Patay diha-diha gilayon si Mark “Macoy” Pulvera, 42, habal-habal driver, taga barangay Camputhaw human pusila kaduha sa nawong ug kamot.

Ang mga mamumuno nagsakay og itom nga motorsiklo nga naka-full-face helmet ug dali kaayong nakasibat human sa pagpamusil.

Usa ka Vicente “Inteng” Climaco nagpuyo sa nahisgutang dapit nga nahinabi sa Banat News nagkanayon nga siya ug ang biktima naglingkod daplin sa dalan dihang kalit nibutho ang mga suspek ug misaylo og gamay.

Ang backrider mikanaog ug mipusil tulo ka higayon sa biktima ug human niini gitiunan usab si Climaco apan giingnan kini sa naulahi nga wala siya'y labot hinungdan nga mibalik og sakay ang suspek sa motor ug miikyas.

Si Chief Inspector Arnel Banzon, hepe sa Mobile Patrol Group (MPG) nikunpirmar dinakpan nila niadtong miaging bulan si Pulvera tungod sa pagdala og armas nga way lisensya.

Sa imbestigasyon sa Homicide Section ang biktima gikatahong nadakpan sa kasong alarm scandal niadtong Septembre 29 ug nakagawas sa bilanggoan human nakabutang og piyansa niadtong Oktubre 8 ning buwana.

Nakuha sa crime scene ang tulo ka mga kabhang sa bala sa .45 kalibre. Matud pa sa ig-agaw sa biktima nga si “isog” ang namatay ug kanunay kining makakita og away. – BANAT NEWS