Oil exploration survey sa Argao, Sibonga gidili na

CEBU - Mimando si Gobernador Gwendolyn Garcia ngadto sa rehiyonal nga buhatan sa Department of Energy (DOE) nga hunongan ang nagpadayong oil exploration surveys uban pang gimbuhaton sa kadagatan didto sa Sibonga ug Argao sa amihanang bahin sa lalawigan sa Sugbu.

Sa Executive Order No. 09, ang gobernador mimando sa Department of Energy Regional Office 7 nga pahunongan ang ilang gihimong survey sa kadagatan hangtud nga dunay himuong konsultasyon sa mga residente nga naapektahan niining maong survey sa oil exploration sa nahisgutang duha ka lungsod.

Midugang ang gobernador nga ang DOE walay konsultasyon nga gihimo sa mga hingtungdan nga lungsod lakip na niini ang kagamhanang probinsyal ug gihulagway niya nga kalapasan kini sa Section 2 sa Republic Act 7160 kun Local Government Code of 1991.

Sa maong balaod dunay polisiya niini nga nag-require sa mga ahensiya sa kagamhanan ug uban nga ahensya sa gobyerno mopahigayon gyud og periodic consultations.

Sa iyang executive order, si Garcia mimando sa Philipine National Police, Philippine Navy, Philippine Coast Guard ug ubang ahensya sa gobiyerno sa pagpatuman sa cease and desist order sanglit gipadad-an man niini og kopya ang tanang ahensya sa gobiyerno lakip na niini ang mayor sa Sibonga ug Argao.

Ang NorAsia, usa ka Australian oil ug gas explorer, mipahigayon og seismic survey susama sa kadagatan sa Tanon strait lakip ang Cebu-Bohol Strait and Argao.

Sila mihimo og seismic survey diha sa kadagatan sa Barangay Simala, Bagakay, Bahay ug Poblacion sa Sibonga niadtong miaging tuig.

Gikatahong ang maong kompaniya nanghatag og pinansyal assistance sa tag P1,500 sa dul-an 2 mil ka mananagat lakip na usab ang gihatagan kadtong dunay mga payaw sa tag P8 mil ngadto sa P10 mil kada usa aron termporaryo kining pabiyaon sa ilang pagpanagat. – BANAT NEWS