CEBU - Mga sakop sa bangiitang tulisan nga si Rey Torres gikatahong nangabot na dinhi sa dakbayan sa Sugbu niadtong miaging adlaw gikan sa Mindanao ug gi-monitor na karon sa kapolisan sa dakbayan sa Sugbu.
Kini maoy gikonpirmar ni Sr. Supt. Patrocinio Comendador, hepe sa kapolisan sa dakbayan sa Sugbu atol sa iyang pag-atubang sa mga sakop sa media diha sa iyang buhatan.
Si Comendador nagkanayon nga adunay sakop sa Torres group nga nag-inusara sa dihang nasigpatan niadtong miaging adlaw sa usa sa mga barangay dinhi sa Metro Cebu apan dali kaayong nahanaw.
Nunot niini iya gilayong gimando sa mga unit sa kapolisan dinhi sa dakbayan nga mohimog subsob nga pagpaniid sa mga dapit nga posibleng taguan sa maong tulisan.
Gipasabot niini nga ang presensiya sa maong tulisan dinhi sa Sugbu dako kaayo ang posibilidad nga aduna kini himuong pagpanulis, hinungdan nga iya nang gipaalerto ang mga establisamento dinhi sa dakbayan, sama sa bangko ug uban pang financial institutions.
Dako usab ang iyang pagtuo nga dunay mga local contacts ang maong tulisan dinhi sa dakbayan sa Sugbu hinungdan nga wala usab sila karo'y kompiyansa sa pag-monitor niini aron dili usab sila maisahan sa kapolisan.
Gibutyag niini nga ang maong bangiitang tulisan aduna kini warrant of arrest diha sa korte sa dakbayan sa Mandaue human usab kini malambigit sa pagpanulis pipila na ka bulan diha sa Visayan Electric Company (VECO) Mandaue. – BANAT NEWS