Habal-habal gikarnap

CEBU - Usa ka motorsiklong habal-habal ang gi-carnap sa duha ka wala hiilhing pasahero human dunggaba niini ang drayber sa maong sakyanan didto sa barangay Tayod lungsod sa Liloan niadtong Martes sa alas 8:45 sa gabii.

Ang biktima mao si Gregorio Reyes Jr., 22, ulitawo, habal habal drayber nga taga Yati, Liloan .

Si SPO1 Marcelino Servilla sa Liloan Police Station mibutyag sa Banat News nga ang duha ka wala hiilhing pasahero misakay didto sa Sitio Bayong sa barangay Yati ug nagpahatod kini sa biktima ngadto sa Tayod.

Apan paghiabot nila sa maong lugar inay mokuot og bayad ang mga suspek, kutsilyo hinoon niini ang gilanit ug giti-on sa liog sa biktima ug nagkanayon,”ayaw’g palag bay motor lang ang among gikinahanglan.”

Mihana og sukol ang biktima hinungdan nga gihansakan dayon kini sa kutsilyo ug nasabak kini sa bukton ug walang bahin sa hawak.

Dihang samaron na ang biktima gisakyan dayon sa duha ka carnapper ang motorsiklo sa biktima nga usa ka Honda XRM-125 nga may plaka nga II-7228, kolor gold, dayong sibat pahilayo sa maong lugar. – BANAT NEWS