Sagip bata himuon sa Carbon

CEBU - Molusad karong adlawa og Operation Sagip Bata diha sa Carbon Area ang nagkadaiyang grupo nga panguluhan ni Cebu City Market Administrator Racquel Arce.

Kini tungod kay namatikdan ni Arce nga nagkadaghan karon ang kabataan diha sa Carbon nga mga badlongon sama sa mga mangunguot, kawatan ug uban pa.

Gihulagway sa market administrator nga kini maoy usa sa dili maayong resulta sa Akta Republika 9344 kon ang Juvenile Justice and Welfare Act.

Ubos sa nahisgutang balaod, dili na mahimong sikupon ug labaw nang dili mahimong mapusasan ang mga nag-edad og kinse anyos paubos.

Kini bisan pa man kung ang maong mga batan-on makahimo og salaud sama sa nahisgutan sa market administrator sa unahan ug uban pang krimen.

Nakig-alayon na si Arce sa Anti-Mendicancy Task Force, Carbon Police Station, Community Scouts, Parian Drop-In Center ug sa DSWD alang sa ilusad nga kalihukan.

Miingon ang market administrator nga lakip sa i-rescue sa Operation Sagip Bata mao kadtong mga rugby boys diha sa nahisgutang dapit.

“Mao man gyud ni sila atong problema diha, kining mga batan-on nga mangunguot, kawatan, lakip na diha nang mga rugby boys ato na silang i-rescue,” sumala ni Arce.

Kadtong ma-rescue nga mga menor de edad dalhon sa buhatan ni Arce ug ilhon ang mga ginikanan niini aron maoy ipaubos sa seminar ug mapahimangnoan.

Samtang kadtong mga menor de edad nga masutang giabandonar sa mga ginikanan, itugyan ni Arce ngadto sa DSWD aron kini na maoy mopahiluna niini.

Posibling ang mga menor de edad nga giabandonar anha ibutang sa Parian Drop-In Center, Community Scouts o sa ubang institusyon nga mosagop og mga bata.

Midugang si Arce nga ang kalihukan nga ilang ilusad karong adlawa himuon na nila kanunay aron hingpit nang mawagtang ang mga badlongon diha sa Carbon area. – BANAT NEWS