Nagsugod na ang panagbangi tali ni Guadalupe barangay captain Eugenio Faelnar ug sa bise presidente sa United Banawa Englis Association Incorporated nga si Jaime Sala.
Si Sala nibahad karon pagkiha kang Faelnar ug sa ubang opisyal sa ilang barangay kung dili makahatag kaniya og kopya sa dokumento nga iyang gipangita.
Ang gipangita ni Sala mao ang barangay resolution 1442-1443 nga penetsahan og Pebrero 5, 2005 nga giaprubahan sa konseho.
Gustong masayod si Sala sa unod sa nahisgutang resolusyon tungod kay kini giingong may kalambigitan sa ilang tinguha nga pagbuwag sa Banawa ug Englis gikan sa Guadalupe.
Apan matod ni Faelnar nga barangay ordinance ang gipangita ni Sala sa suwat nga gipadala niini kaniya ug siya giingong walay nahinumduman niini.
“Whoever is responsible for the lose must be brought to trial for it is a public document and essential and vital to the people who are concerned,” tipik sa suwat ni Sala ngadtong Faelnar.
Gisaway ug gikataw-an lang hinoon ni Faelnar ang suwat ni Sala ug wala mohatag og igong pagtagad sa gipadangat niining bahad.
Apan nidugang ang kapitan nga iyang tubagon ang suwat ni Sala aron kini mahatagan og katin-awan sa iyang gipangayo nga dokumento.“Kinsa man tawon iyang ikiha ana nga wa man nay klaro iyang gipangita, sige lang kay ako man nang tubagon,” sumala ni Faelnar.
Gitataw sa kapitan nga siya dili mobabag sa tinguha ni Sala ug kaubanan kung mayoriya sa molupyo sa duha ka sitio ang gusto nang mabuwag sa Guadalupe.
Apan gipadayag sa kapitan nga basi sa iyang nahipos nga kasayuran gikan sa iyang mga konsehal nga molupyo sa Banawa, ang grupo lang ni Sala maoy gusto niini.
Nasayran nga ang asosasyon ni Sala padayong nanghipos og mga pirma gikan sa mga mulopyo sa Banawa ug Englis aron isuporta sa balaudnon ni Kongresista Antonio Cuenco.
Ang nahisgutang balaudnon maoy nagbuhi sa tinguha ni Sala ug kaubanan alang sa hingpit nang pagbuwag sa duha ka sitio gikan sa Guadalupe.