Mini nga PDEA tiklo

CEBU – Usa ka tawong nagpaila nga asset sa Philippine Drugs Enforcement Agency (PDEA-7) gibalhog sa karsel sa Pardo Police Station human hidakpi nga nagtangkil og armas nga way lisensya sa usa ka checkpoint sa kapolisan sa Pardo kagahapon sa kaadlawon.

Ang nagtingkagol karon giila nga si Jesus Sarin, 36, minyo nga nagpuyo sa Barangay Bulacao apan lumad nga taga Sto. Rosario Ormoc City .

Nasakmit gikan sa suspetsado mao ang .357 kalibre nga armas de fuego nga may upat ka buhing bala ug usa ka kabhang.

Si PO3 Richard Tagadian sa Pardo Police Station nga gikahinabi sa Banat News nagkanayon nga si Sarin nasikop sa ilang miscelaneous team nga nipahigayon og check point sa nahisgutang dapit samtang nagsakay kini og motorsiklo.

Gikan sa downtown Cebu City ang suspetsado paingon sa Bulacao dihang gipara kini sa kapolisan ug sa dihang girikisa nahinulan ang walay lisensya nga .357 nga gitangkil sa hawak niini.

Gikatahong misuway pa untag ikyas si Sarin aron dili marikisahan apan abtik kaayo ang kapulisan nga misanta ug miposas kaniya.

Matud pa ni PO3 Tagadian nga ang suspetsado nangangkong asset   sa PDEA ug mipakita pa og usa ka   ID.

Apan tungod kay wala makapakita og lisensya sa armas sayon ra kaayong gibalhog sa prisohan ang suspetsado.

Sa pagkakaron gisuta pa sa kapolisan sa Pardo kun tinuod bang sakop sa PDEA ang suspetsado samtang kasong kalapasan sa RA. 8294 ang isang-at sa kapolisan batok niini karong adlawa gumikan sa paghupot niini og armas nga way lisensya. Samtang gisusi usab sa kapolisan ang background sa akusado kun wala ba kini malambigit sa pagpanulis nga magsakay og motorsiklo dinhi sa dakbayan. – BANAT NEWS