CEBU – Namatay gyud ang usa ka 60-anyos nga lola human kini madasmagi og motorsiklo sa iyang pagtabok sa karsada sa National Highway, Poblacion Ward IV, lungsod sa Minglanilla niadtong Biyernes sa udto.
Si Natalia Cañada, 60, minyo, molupyo sa sitio Bayong, barangay Cadulawan, sakop sa maong lungsod namatay sa pribadong tambalanan sa Naga human kini madam-agi sa motorsiklo nga gimaneho ni Detontonum Heno Enanosa, molupyo sa barangay Tangke, lungsod sa Naga.
Matud pa ni PO1 Rodolfo Quilala sa Minglanilla Police Station, nga si Cañada naglakaw sa naasoy’ng lugar paingong mopauli sa dihang mitabok kini nga wala makabantay sa nagpadulong nga motorsiklo.
Sumala pa sa kapolisan nga maayong pagkalamba sa biktima ngadto sa sementadong karsada tungod sa kakusog sa impact sa pagkadasmag.
Ang drayber nga si Enanosa natagak usab sa iyang motorsiklo hinungdan sa mga pangos ug bun-og nga naangkon niini.
Si Enanosa boluntaryong mitahan sa iyang kaugalingon ngadto sa kapolisan ug nagpaabot nga pasakaan og kasong reckless imprudence resulting to homicide ugmang adlaw. – BANAT NEWS