CEBU - Patay ang usa ka mamuhatay og uling human kini gisulod sa usa ka wala mailhing lalaki diha sa iyang payag niadtong milabay’ng hapon sa sitio Campo sa barangay Binaliw ning dakbayan.
Ang biktima giilang si Gerry Bontilao,22, residente sa maong dapit kinsa gikatahong nagpahulay sa iyang payag niadtong higayuna dihang gipusil sa maong lalaking nagsuot lang og kolor green.
Matud pang SPO1 Geoffrey Gutual sa Homicide Section sa pakighinabi sa Banat News ang apuhan sa biktima nga si Mamerta, 78, maoy unang giduol sa suspek ug gipangutana kabahin sa biktima.
Ang apuhan sa biktima nga wala magdahom nga dautan ang tuyo sa suspek sa iyang apo iyaha kining gitultulan kung asa nga payag kini mopahulay ug gipasagdan ang suspek nga moadto sa dapit.
Dangtan pila ka minutos kalit nga nakadungog og paka sa buto sa armas si Mamerta hinungdan nga iyang, gisusi ang payag ug mao nalay iyang nakit-ang nagbuy-od na ang apo nga nagkadugo ang kalawasan.
Ang biktima naigo diha sa walang bahin sa abaga, walang bahin sa dapidapi ug sa walang bahin sa liog ug wala na matabang ug nakabsan sa iyang kinabuhi. – BANAT NEWS