Hingulatang amahan gidunggab sa anak

Gisang-at na sa kapulisan sa dakbayan sa Sugbu ang kasong frustrated parricide batok sa 24-anyos nga anak nga babaye kinsa nidunggab sa kaugalingong amahan niadtong Miyerkules sa buntag duol sa barangay hall sa Proper barangay Ermita.

Ang gipasakaan og kaso giila mao si Sundanisa Nodalo dunay duha ka mga anak ug may kapuyo ug nagpuyo sa nahisgutang barangay samtang ang iyang amahang biktima mao si Reynaldo Nodalo, 46, usa ka utility worker sa nahisgutang barangay.

Ang amahan nga si Reynaldo kasamtangan nagpa-alim sa Cebu City Medical Center (CCMC) human makaangkon og samad dinunggaban sa tuong bahin sa lawas human dunggaba ni Sunadinsa.

Sa report sa mga imbestigador sa Homicide Section sa Cebu City Police gikataho nga si Reynaldo gidunggab sa anak human wa makaagwantang nagtan-aw sa iyang inahan nga si Sonia gikulata sa biktima pinaagi sa pagyatak-yatak, sukmag uban pa.

Ang anak nga si Sundanisa nga naluoy sa iyang inahan nikuha’g kutsilyo sa kusina ug sa kalit gidunggab ang amahan nga nagsige’g kulata sa iyang inahan.

Human sa pagpanunggab si Sundanisa daling nakasibat ug gigukod sa mga barangay tanod sa nahisgutang barangay apan didto na mosurender sa barangay hall sa barangay Sawang Calero.

Si Reynaldo wala modawat sa gipangayong pasaylo sa iyang anak hinungdan nga gipasaka gyud sa kapulisan ang kasong parricide.

Nasayran nga ang amahan ug inahan sa suspetsado nagkabuwag na sulod sa 14 ka tuig apan gikatahong nag-sustento ang ilang amahan kanila gikan sa madawat niining suhulan nga tag P3 mill buwan isip utility sa barangay Hall Ermita.

Matud pa nga nasuko ang amahan sa iyang inahan human gikuhaan ang sweldo og usa ka libo hinungdan nga nagka-konprontasi ang duruha kay matud pa gusto sa biktima nga 500 pesos maoy ihatag ug sa kasuko gikulata ang iyang inahan.