2 ka wanted sa Moalboal nangasikop na

Sa katapusan nasikop ra gyud sa kapolisan ang duha ka mga lalaki nga gitumbok nga most wanted persons sa lungsod sa Moalboal nga nagtago-tago sulod na sa onse ka tuig kapin.

Ang mga suspek nga nadakpan atol sa joint operation sa kapulisan sa Moalboal ug Carcar City Police mao sila si Frankie Delicano, 37,ug Rommel Castillo, 37, pulos molupyo sa barangay Lanao, Moalboal.

Matud ni PO1 Rommel Gako sa Moalboal Police nadakpan ang duha atol sa joint operation sa kapulisan sa Moalboal ug Carcar sa barangay Poblacion sa Carcar niadtong Miyerkules sa alas 5:30 sa hapon.

Ang pagsikop sa mga suspek pinasubay sa warrant of arrest sa kasong multiple frustrated murder nga giluwatan ni MCTC Judge Victor Teves sa Moalboal.

Matud ni PO1 Gako ang mga suspek maoy gitumbok nga responsable sa pagpamusil sa tulo ka mga silingan sa barangay Lanao gamit ang shotgun niadtong tuig 1997.

Gikatahong taud-taud nang gipangita sa awtoridad ang mga suspek apan nanglarga sila didto sa Mindanao ug niadto lang nilabay’ng tuig nipauli dinhi sa Sugbu apan didto na mag-estar sa siyudad sa Carcar.

Dunay nakahatag og impormasyon sa kapolisan sa Moalboal sa nahimutangan sa mga suspek hinungdan nga gilusad dayun ang joint operation nga niresulta sa pagkasikop kanila niadtong Martes sa alas 5:30 sa hapon ug pagka alas 8:00 sa gabii gidala sila didto sa kapulisan sa Moalboal.