4 angol sa nabanggang sakyanan

CEBU - Nangaangol ang upat ka mga trabahante sa construction kay ang trak de karga nga ilang gisakyan nga gimaneho sa hubog nilang kauban nabangga sa pader sa usa ka beach resort didto sa Sitio Baha baha, Poblacion lungsod sa Argao niadtong Martes sa alas 2:30 sa kaadlawon.

Ang mga biktima mao si Jacinto Baclaan, hingkod, nga taga Tayod, Liloan, Jason Birondo, hingkod, minyo, nga taga Sitio Prenza, Talaga, Argao,; Pepito Galo, 51, ulitawo, taga Tayod , Liloan; ug Narciso Jodaya, hingkod , taga Tayod, Liloan gihapon.

Si PO1 Benjamen Geyrosaga sa Argao Police Station mibutyag sa Banat News nga sa sayo pa nag-inom ang mga biktima sa usa ka kan-anan sa Don Gil St., Poblacion, Argao nianang mga alas 11:00 sa kagabhion.

Apan pagkahuman nila og inom nanakay sila sa ilang service nga Isuzu Elf kay mamauli na ngadto sa ilang trabahoan nga nahimutang sa Sitio Dalas-as, Talaga.

Matud ni PO1 Geyrosaga nga gumikan sa kalasbag, wala na magkadimao ang pagmaneho ni Baclaan sa sakyanan kay bisan ang sudlanan sa basura sa tindahan nga ilang giinoman,gipaligsan kini.

Matud pa sa nakasaksi nga napungot ang tag-iya sa tindahan nga ilang giinoman ug gisinggitan pa ang drayber gumikan sa pagkapigsat sa iyang sudlanan sa basura.

Apan imbis mohunong, mipasutoy na hinuon sa pagpadagan ang drayber ug gumikan sa kahubog, nag-ikis-ikis ang dagan sa sakyanan hangtod nga midasmag kini sa sementadong pader sa Sunshine Beach club .

Gumikan sa maong hitabo, naka-angkon og mga pangos ug bun-og ang drayber ingon man ang tulo niya ka mga kauban.

Gihatod dayon ang mga biktima ngadto sa Vicente Sotto Memorial Medical Center (VSMMC) aron sa pagsalbar sa mga kinabuhi niini.

Dihang gisukit sa kapolisan, mitug-an ang drayber nga nawad-an og preno ang maong sakyanan hinungdan nga wala na niya kini makontrolar ug nabangga gyud sa pader.

Apan pipila ka mga nakasaksi sa hitabo nagtuo nga hubog gyud ang drayber nga maoy hinungdan sa maong disgrasya. (BANAT NEWS)